Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,025 Auteur: Uc de Sant Circ Genre: Canso Numero: VIII

Nuilla ren que mestier m'aia

I	1	Nuilla ren que mestier m’aia,
		Mas cant un pauc de saber
		Non ai de far chansson gaia ;
		Q’ieu non ai joi ni l’esper
	5	D’amor, ni d’autras razos
		Non es avinens chanssos ;
		Mas del ben qu’eu ai volgut
		E del mal q’ieu ai agut
		E del desir don mi duoill
	10	La farai, pois far la vuoill.
II		Quant hom plus ve ni esaia,
		Ni sent joi ni desplazer,
		Plus deu gardar non s’atraia
		Lai don joi non pot aver,
	15	C’ara es una sazos
		Que mal rend hom guizerdos
		E servizi son perdut
		E benfaich desconogut
		Et Amors vol et acuoill
	20	Aicels qe mais ant d’orguoill.
III		Greu trob’om dompna veraia
		Ni qe·is vuoilla en car tener,
		Ni amic de cui s’eschaia
		Que deja joi conqerer ;
	25	Mas los fals feignens gignos
		Tenon las falsas joios,
		E·l fin son per lor temsut ;
		Q’eu n’agra joi receubut
		Si·l mieu fin ferm franc escuoill
	30	Vires e·l lor fraich fals fuoill.
IV		Ses prometre e senes paia `
		Si pot dompna dechazer,
		Si fa semblan qe li plaia
		Aisso que no·il deu plazer,
	35	Car de semblans nais ressos
		Mals, don intron en tenssos
		Tal que s’ant gran ben volgut ;
		E non crezatz q’ieu descut
		Aiso q’auran vist miei huoill
	40	Ni puois sia aitals cum suoill.
V		Mais per ren c’om m’en retraia
		Ni q’ieu i puosca vezer,
		Non ai poder qe n’estraia
		Mon fin cor ni mon voler,
	45	C’amics humils amoros
		Fis ferms desaventuros
		Sui, c’ades m’aura nogut
		So qe·m degra aver valgut ;
		Car no·m biais ni·m destuoill
	50	Non ai joi ni·n pren ni·n cuoill.
VI		Et on plus ella m’esglaia
		Ni·m fai plagner ni doler,
		Il ri e chanta e s’apaia
		E·is dona joi e lezer ;
	55	Il m’es mala, eu li sui bos ;
		En sui agnels, ill leos ;
		Il m’a lonc temps vil tengut,
		Eu lieis car’ ; il m’a vencut,
		Eu no la vens, ni m’en tuoill,
	60	Si tot il me desacuoill.
VII		Regina Saincha, Aragos
		E Tolsans et Avignos
		Son gen per vos revengut ;
		E Dieus vos fai tal vertut
	65	Q’el vostr’ onrat ric capduoill
		Trob’om flor e fruich e fuoill.