Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Vocabulaire
* Observations

* Présentation
* Bibliographie
* Témoignage
* Appareil critique
* Notes
* Traductions
* Images

Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,018 Auteur: Uc de Sant Circ Genre: Canso Numero: X

Longamen ai atenduda

I
1
Longamen ai atenduda
   
Una razon avinen
   
Don fezes chansson plazen,
   
Mas ancar no m’es venguda ;
 
5
E si vuoill de la razo
   
Qu’ieu ai far vera chanso,
   
Ela sera mieig partida :
   
Chansos joiosa e marrida,
   
Lausan del ben q’ai agut
 
10
E plangen car l’ai perdut.
     
II
 
Cui Dieus vol ben si l’aiuda,
   
C’a mi volc ben longamen,
   
Qe·m det un ric joi gauzen
   
De vos, c’ara ai perduda.
 
15
Ai Dieus, tant plazens mi fo
   
Lo jois e tant mi saup bo,
   
E tant aic avinen vida !
   
Mas aora m’es faillida,
   
Q’ieu me sent d’aut bas cazut
 
20
E·l cor de tot ric joi nut.
     
III
 
De l’onor q’ai receubuda
    Del vostre cors covinen
   
Ai mon cor trist e dolen,
   
Car vei qe·l volers vos muda
 
25
C’aviatz en la sazo
   
Qan Dieus volia mon pro.
   
Ai, tant mi dol la partida !
   
E si l’amors es fenida
   
Mal ai vostre cors vegut
 
30
Ed ben qe·i es conogut.
     
IV
 
Fols cors si penssa e cuda
   
Que leu pretz so que·l dissen,
   
E per fol neci parven
   
Ai vista tal decazuda
 
35
Q’estava en ric resso
   
De valor et de faisso ;
   
Car cella cui foldatz guida
   
Cuida esser enriquida
   
Qand ve que siei faich menut
 
40
Intron en crim e en brut.
     
V
 
E pois dompna es dissenduda
   
Per blasme de faillimen,
   
No i a mais revenimen,
    C’onors de loing la saluda ;
 
45
Car de justa faillizo
   
Troba greu dompna perdo,
   
Anz li cor chascus e·il crida,
   
Et anz que torn en oblida
   
Lo crims a tant corregut
 
50
Qu’il es tornada en refut.
     
VI
 
Dompna, si·us etz irascuda
   
Vas mi, ges no·us mi deffen,
   
Ni·us mi tuoill ni·us vau fugen ;
   
C’anc pois vos aic conoguda,
 
55
Non agui entenssio
   
C’ab autra si ab vos no
   
Trobes capteing ni garida ;
   
Car vos m’etz tant abellida
   
Qe non vuoill ses vos m’ajut
 
60
Dieus ni·m don joi ni salut.
     
VII
 
Lai on non es conoguda
    Dreitura, fai falhizo
   
Qui vai demandar razo,
   
E lai on blasm’om faillida
 
65
Degr’esser onors grazida ;
   
Mas eu ai tart conogut
    So qe·m notz ni m’a nogut.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI