Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,035 Auteur: Uc de Sant Circ Genre: Canso Numero: XI

Ses dezir et ses razo

I	1	Ses dezir et ses razo —
		Que non ai don sia gais —
		Mi ven e mon cor e·m nais
		Us doutz volers, qe·m somo
	5	Q’ieu chan e fassa chansso
		E qe·m done solatz et alegranssa
		E sia gais e qe·n fassa semblanssa,
		Qe d’alegrier ven hom en bon esper
		E de bon’ esperansa en gran plazer.
II	10	Vers es que longa sazo
		Ai estat en grans esmais
		Cargatz d’ira e d’esglais,
		En gerra et en tensso
		Ab cellieis que mala fo,
	15	Ai, tan plazens e de bell’ acoindanssa,
		Qe·l cor m’auci la doussa remembranssa ;
		Mas mal mon grat, segon q’ieu fatz parer,
		Torn lieis q’ieu plus desir en non caler.
III		E si n’ai mon cor fello,
	20	Ni·m plor ni·m plaing ni·m n’irais
		Per leis que s’amor m’estrais,
		Mi ni lieis non ochaiso,
		C’aitals ai estatz e so
		Que anc d’Amor non aic gran benananssa
	25	Que no·m tornes en dol et en pesanssa,
		Ni anc nul tens non puoc gran joi aver
		Qe·l joi en dol no·m fezes remaner.
IV		Del mieu dan feira perdo,
		Que no m’en clamera mais,
	30	Mas al cor ai ir’ e fais
		Qan vei d’una dompna pro,
		Don s’alegron tuich li bo,
		Que pren de si de l’autrui tort venganssa
		Tal don sos pretz et ill torn’ en erransa;
	35	E pros dompna non degra dechazer
		Si ni son pretz per autrui far doler.
V		Et ieu sui d’aital faisso
		C’anc vas dompna no m’atrais
		Beutatz ni jovens ni jais,
	40	Pois fez de si a mains do ;
		Que pois dona entenssio
		Dompna a chascun, eu non teing ad honranssa
		L’onor q’il fai, car ses dar esperansa
		Pot ben dompna que a sen e saber
	45	Salvant s’onor maint amic retener.
VI		Ben volria saubes per devinanssa
		Cill q’ieu desir la doussa desiranssa
		C’ai e mon cor del sieu gen cors vezer
		On son complit tuich avinen plazer.