Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Codi: 225,002 Autor: Guilhem de Montanhagol Gènere: Canso Número: II

 

Ar ab lo coinde pascor

I	1	Ar ab lo coinde pascor,
		Quan vei de bella color
		Flors per vergiers e per pratz,
		E aug chantar daus totz latz
	5	Los auzeletz per doussor,
		Vuelh far ab coindia
		Chanso tal que sia
		Plazens als enamoratz,
		E a midons majormen
	10	Que·m don' en trobar engenh.
II		Ben devon li amador
		De bon cor servir Amor,
		Quar amors non es peccatz,
		Anz es vertutz que·ls malvatz
	15	Fai bos, e·lh bo·n son melhor,
		E met om' en via
		De ben far tot dia;
		E d'amor mou castitatz,
		Quar qui·n amor ben s'enten
	20	No pot far que pueis mal renh.
III		E pos tant a de valor
		Amors, ben fan gran follor
		Las dompnas on es beutatz,
		Quar non amo los prezatz
	25	Pos o conoisson en lor;
		Quar pueis lor plairia
		Jois, e cortezia,
		E chans, e totz bels solatz;
		Mas greu faran tan de sen
	30	S' Amors no las i empenh.
IV		Amors, de vos faz lauzor,
		Qu'amar mi fatz la gensor;
		Don mi suy tant aut pujatz
		Que·l morirs neis m'es onratz,
	35	Tant es de nobla ricor;
		E s'ieu joi n'avia,
		Sai que non morria,
		Anz viuria gen pagatz.
		Si non l'ai, morrai breumen,
	40	Qu'ieu l'am tan que·l cor m'estenh.
V		Qui ve la fresca color
		De vos, bella, cui ador,
		E·ls uelhs vairs, e·ls cilhs delgatz
		. . . . . . . . . . . .
	45	De natural resplandor,
		Totz om pert feunia,
		Qui·us esgar, amia.
		E ieu, las, a cui mais platz,
		Mueir, quan vei vostre cors gen,
	50	D'enveia tan mi destrenh.
VI		Fis pretz deschairia,
		Si no·l sostenia
		Le reis Castellans onratz,
		Que fai totz sos faitz tan gen
	55	Qu'en ren non cal qu'om l'ensenh.