Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Codi: 076,004 Autor: Bertran d'Alamanon Gènere: Sirventes Número: III

 

De l'arciuesque mi sa bon

I	1	De l’arciuesque mi sa bon
		Q’ieu un seruentes fasa,
		Don ieu dirai, Dieus m’o perdon,
		Donei de mala cassa ;
	5	De nul mal no si lassa
		Qe puesca far,
		Ni tem duptar
		En ren q’a Dieu desplasa,
		Q’en totz fatz o traspassa ;
	10	Per qe plus fols
		Par qe s’auia massa.
II		Anc non ui tan fals coronat
		Nuls hom qe tenges terra,
		Q’el no tem far tort ni peccat
	15	Et mescla tot l’an gerra,
		E·ls sieus baissa en terra,
		E·ls pren souen
		Per son fol sen
		E·ls enclaus e·ls enserra.
	20	Ueiatz del fals com erra,
		Qe per aver
		Ueda e solu e soterra.
III		Jonqera aucis per auer
		Dinz la maison escura,
	25	Qes anc nuls homs no·i poc saber
		Nuilh’ autra forfachura.
		El non ha de Dieu cura,
		Per qe mescre
		La ferma fe
	30	Q’es en sant’ escritura.
		Ben er mal’ auentura,
		Se·l legatz ue,
		Si no·l crema o no·l mura.
IV		Cill d’Arll’ estauan a legor
	35	Ses trebailh e ses nausa,
		Tro qe l’agron, lo fals pastor.
		Ben es fols qar el ausa
		Penr’aissi la lur causa,
		Ni far perdon
	40	Del dan qe fon.
		Ueias s’es fera causa.
		Ja mais non auran pausa
		Si no·l meton
		Tot uiu desot la lausa.
V	45	El ha los set peccatz mortals
		Per q’om ten mala via :
		Aucir no tem ni periurs fals,
		E uiu de raubaria ;
		Ergueilh e auaria
	50	A·l renegatz,
		Et es proatz
		De falsa garentia.
		Lo seten no diria ;
		Qar es tan laitz,
	55	M’en lais per cortesia.
VI		Archevesque que sia
		De tant prouatz,
		Escumenjat paria,
VII		E son vet non tenria,
	60	Car hom uedatz
		Vedar non mi porria.