Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,014 Autor: Folquet de Marselha Gènere: Canso Número: IV

 

Molt i fetz gran pechat Amors

		Versione α
I		Molt i fetz gran pechat Amors,
		quan li plac que·s meses en me,
		car Merce no·i aduis ab se
		ab que s’adousses ma dolors;
	5	c’Amors pert so nom e·l desmen
		et es Desamors planamen
		pois Merces no·i pot far socors;
		a cui fora pretz et honors,
		pois ill vol vensser totas res,
	10	c’una vetz la vences Merces.
II		Si no·us venz, vencutz sui, Amors;
		vencer no·us puosc mas ab Merce;
		e s’entre tans mals n’ai un be,
		ja no·us er dans ni deshonors;
	15	cuidatz vos que·us estia gen
		car mi faitz plaigner tan soven?
		anz en val meins vostra lauzors;
		pero·l mals mi fora doussors,
		sol l’aut ram a qu’era·m sui pres
	20	mi plejes, merceian, Merces.
III		Mas trop m’a adirat Amors
		car ab Merce si desave;
		pero·l mieills del mieills quez hom ve,
		midonz, que val mais que valors,
	25	en pot leu far acordamen,
		que major n’a faich per un cen:
		qui ve cum la neus e·il calors,
		so es la blanquesa e·l colors,
		s’acordon en lieis, semblans es
	30	c’Amors s’i acort e Merces.
IV		Mas non pot esser, pois Amors
		non o vol, ni midonz, so cre;
		pero de midonz no sai re
		c’anc tant no m’enfollic folors
	35	qu’eu l’auses dir mon pessamen,
		mas cor ai que·m cabdel ab sen,
		ab l’ardimen que·m tol paors;
		pero esperars fai las flors
		tornar fruig, e de midonz pes
	40	qu’esperan la venssa Merces.
V		Estiers non puosc durar, Amors,
		e non sai cossi s’esdeve
		de mon cor, qu’en si·us a e·us te
		que ren non cuig que n’aia aillors;
	45	que, si be·us etz grans, eissamen
		podetz en mi caber leumen
		co·s devezis una grans tors
		en un pauc miraill, e·il largors
		es tant grans que, si vos plagues,
	50	ancar neis i caubra Merces.
VI		Mal me sui gardatz per non-sen,
		c’a mi eis m’a emblat Amors
		ar qu’era estortz de sas dolors;
		mas dir puosc qu’ieu eis me sui pres
	55	pois que no·m val dreitz ni Merces.
VII		N’Azimans, lo vostre socors
		e d’En Totztems volgr’ ieu aillors,
		mas d’aquest no vuoill sapchatz jes
		c’a penas neis o sap Merces.
		Versione β
I		Molt i fes gran pecat Amors,
		pos li plac que·s mezes en me,
		quar merce non aduis ab se
		ab que s’adousis ma dolors;
	5	c’Amors pert son nom e·l desmen
		et es Dezamors planamen
		pos Merces no·i pot far secors;
		per que·ill fora pretz e honors,
		pos ill vol vencer totas res,
	10	c’una vetz la venques Merces.
II		S’ar no·us vens, vencutz soi, Amors;
		venser no·us puesc mas ab Merce;
		e s’entre tans mals n’ai un be,
		ja no·us er dans ni dezonors;
	15	cuidatz vos donx que·us estei gen
		quar me faitz planher tan soven?
		ans en val meins vostra valors;
		pero·l mals m’en fora dousors,
		si l’aut ram a cui me soi tes
	20	me plegues, merceian, Merces.
III		Mas trop m’a azirat Amors
		quant ab Merce se dezave;
		pero·l meils del meils que hom ve,
		midons, que val mais que valors,
	25	en pot leu far acordamen,
		quar mager n’a fait per un sen:
		qui ve com la neus e·l calors,
		so es la blanquez e·ill colors,
		s’acordon en leis, semblans es
	30	c’Amors s’i acort ab Merces.
IV		Mas non pot esser, pos Amors
		non ho vol, ni midonz, so cre;
		pero de midons non sai re
		c’anc tan no m’enfolit folors
	35	que l’auzes dir mon pensamen,
		mas cor ai que·m cabdel ab sen
		mon ardimen que·m tol paors;
		pero, esperan, fai la flors
		tornar fruit, e d’amor som pes
	40	qu’esperan la venques Merces.
V		Qu’estiers no·us puesc durar, Amors,
		e no sai consi s’esdeve
		de mon cor, qu’aissi·us a e·us te
		que re nom par que n’ai’ aillors;
	45	quar si be·us es grans, eisamen
		podetz en me caber leumen
		co·s devezis una grans tors
		en un pauc miraill, e·il largors
		es aitan grans que, si·us plagues,
	50	encar neus i caubra Merces.
VI		Mal me soi gardatz per no-sen,
		quar mi eis m’a emblat Amors
		ara que reston de las flors;
		mas dir pot qu’ieu eis me soi pres
	55	pueis que no·m val dreitz ni Merces.
VII		N’Aziman, lo vostre secors
		e d’En Tostems vueill ben alhors,
		mas aiso no vueill sapchatz ges
		c’a penas neis o sap Merces.