Cura Curà, Giulio. Le canzoni del trovatore Uc de Pena. "Critica del Testo", 10, 2 (2007), pp. 9-45.

Codi: 456,002 Autor: Uc de Pena Gènere: Canso Número: II

 

Si anc me fes Amors que·m desplagues

I	1	Si anc me fes Amors que·m desplagues,
		Be·m restaura en vos, domna, lo dan:
		Sabes per que? Car on pus vau pessan
		Vostra valor e vostra conoysensa
	5	E·l gen parlar e l'avinen solatz,
		Adoncx soy yeu pus fort enamoratz
		E ay tal joy, can de vos me sove,
		C'ades cuja mos cors trobar merce.
II		E si be·m lau d'amor, si soi ieu pres,
	10	Francs et adregz et ab humil talan,
		Fis e lials e senes tot enjan,
		Per vos, don', on pretz melhur'e gensa.
		Sabetz que·m pres? Vostra fina beutatz,
		Don soy aisi del tot apoderatz
	15	Que ges non ay degun poder en me,
		Mas tan can vos m'en donatz per merce.
III		Pero ades vos deu plazer mos bes,
		Que mans ricx joys n'auray mes en soan
		Per vos, dona, c'autra no vuelh ni·n blan,
	20	Tan vos soy fis ab ferma bevolensa:
		Per que·m deu ben esser, dona, si·eus platz,
		Grazitz l'afans que n'ay sofert en patz
		E sufriray tro conoscatz que be
		Devetz aver d'aital amic merce.
IV	25	Anc Lanselotz, can sa dona·l promes
		Que faria per el tot son coman,
		Si·l mostrava un fin lial aman,
		Non poc aver de si eys sovinensa,
		Bona domna, tan fort s'er oblidatz,
	30	Tro que merces lo·i ac adretz esgratz
		Lai on razos non li valia re:
		Per qu'ieu aten de vos aital merce.
V		Leu m'agues vos, dona, del tot conques
		Lo jorn qu'ieu vi vostre cors benestant,
	35	Per que·m devetz, si·eus platz
		Ad obs d'amar; e si n'era forsatz
		D'Amor, dona, ja per neguna re
		No·us prec que mays ajatz de mi merce.
VI		E sel que fa so que pot gent e be
	40	Deu ben trobar ab fin'amor merce.