Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 156,015 Autor: Folquet de Marselha Gènere: Alba religieuse Número: XXVI

 

Vers Dieus, el vostre nom e de sancta Maria

I		Vers Dieus, el vostre nom e de sancta Maria
		m’esvelharai hueimais, pus l’estela del dia
		ven daus Ierusalem, que m’essenha qu’ieu dia:
		estatz sus e levatz,
	5	senhors que Dieu amatz!
		que·l jorns es aprosmatz
		e la nuech ten sa via;
		e sia·n Dieus lauzatz
		per nos, e adoratz,
	10	e·l preguem que·ns don patz
		a tota nostra via.
		La nuech vai e·l jorns ve
		ab clar cel e sere
		e l’alba no·s rete
	15	ans ve belh’ e complia.
II		Senher Dieus que nasquetz de la Verge Maria
		per nos guerir de mort e per restaurar via
		e per destruir’ efern que·l diables tenia
		e fos en crotz levatz
	20	de spinas coronaz
		e de fel abeuratz,
		Senher, merce vos cria
		aquest pobles onratz,
		que·lh vostra pietatz
	25	lor perdon lor peccatz;
		amen, Dieus, aissi sia.
		La nuech vai e·l jorns ve
		ab clar cel e sere
		[e l’alba no·s rete
	30	ans ve belh’ e complia.]
III		Qui no sap Dieu prejar ops es que o aprenda
		et auja qu’ieu dirai et escout et entenda:
		Dieus que comensamens es de tota fazenda
		laus vos ren e merce
	35	† e del be †	(-3)
		que m’avetz fag ancse;
		e prec, Senher, que·us prenda
		gran[s] pietatz de me,
		que no·m truep ni·m malme
	40	ni m’engane de re
		diables ni·m mesprenda.
		La nuech vai e·l jorns ve
		[ab clar cel e sere
		e l’alba no·s rete
	45	ans ve belh’ e complia.]
IV		Dieus, donatz me saber e sen ab qu’ieu aprenda
		vostres sanhs mandamens e·ls auja e·ls entenda,
		e·l vostra pietatz, que·m geris, que·m defenda
		d’aquest segle terre
	50	que no·m trabuc ab se;
		quar ie·us ador e·us cre,
		Senher, e·us fauc ufrenda
		de me e de ma fe,
		qu’aissi·s tanh e·s cove;
	55	per so vos crit merce
		e de mos tortz esmenda.
		La nuech vai e·l jorns ve
		ab clar cel e sere
		[e l’alba no·s rete
	60	ans ve belh’ e complia.]
V		Aquel glorios Dieus que son cors det a venda
		per totz nos a salvar prec qu’entre nos estenda
		lo sieu Sant Esperit que de mal nos defenda,
		e d’aitan nos estre
	65	josta los sieus nos me
		lai sus on si capte,
		e·ns meta dins sa tenda.
		La nuech vai e·l jorns ve
		[ab clar cel e sere
	70	e l’alba no·s rete
		ans ve belh’ e complia.]