Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Codi: 217,005 Autor: Guilhem Figueira Gènere: Sirventes Número: 4

 

Nom laissarai per paor

I	1	Nom laissarai per paor
		C’un sirventes non labor
		En servizi dels clergatz,
		E quan sera laoratz,
	5	Conoisseran li plusor
		L’engan e la fellonia
		Que mou de falsa clersia,
		Que lai on ant mais forssa ni poder,
		Fant plus de mal e plus de desplazer.
II	10	Aquist fals prezicador
		Ant mes lo segle en error,
		Qu’il fan los mortals peccatz.
		Pois cilh cui ant prezicatz,
		Fant que vezon far a lor,
	15	E tuich segon orba via.
		Doncs si l’uns orbs l’autre guia,
		Non van amdui en la fossa cazer?
		Si fant, so dis dieus, qu’ie’n sai ben lo ver.
III		Vers es que nostre pastor
	20	Son tornat lop raubador,
		Qu’il raubon deves totz latz,
		E mostron semblan de patz,
		E confortan ab doussor
		Lor ovelhas nuoich e dia;
	25	Pois quan las an en balhia,
		Et ilh las fant morir e dechazer,
		Ist fals pastor; don eu m’en desesper.
IV		Pois fan autra desonor
		Al segle et a dieu major,
	30	Que s’uns d’els ab fenma jatz,
		L’endeman totz orrejatz
		Tenral cors nostre senhor.
		Et es mortals eretgia,
		Que nulhs preire nois deuria
	35	Ab sa putan orrejar aquel ser
		Que l’endeman dejal cors dieu tener.
V		E si vos en faitz clamor,
		Seran vos encusador,
		E seretz n’escumenjatz;
	40	Ni, s’aver no lor donatz,
		Ab els non auretz amor
		Ni amistat ni paria.
		Vergena, sancta Maria,
		Sius platz, domna, laissatz mel jorn vezer,
	45	Qu’ieuls puosca pauc doptar e mens temer.
VI		Vai, sirventes, ten ta via
		E dim a falsa clercia,
		C’aicel es mortz queis met e son poder,
		Qu’a Tolosa en sap hom ben lo ver.