Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Codi: 217,007 Autor: Guilhem Figueira Gènere: Chanson de croisade Número: 6

 

Totz hom qui ben comensa e ben fenis

I	1	Totz hom qui ben comensa e ben fenis,
		Lonha de si blasm’e reten lauzor,
		Quar dieus dona a bon comensador
		Bona forsa tan qu’es bona la fis.
	5	Ni anc ses dieu fi ni comensamen
		No vim fruchar fruit de bona semensa,
		Mas selh que ben fenis e ben comensa,
		Ren frug de prez e frug de salvamen.
II		Aquest bos frugz nais primiers e floris
	10	De bona fe, e pueis, quant es en flor,
		Bonas obras noirissol ab doussor,
		Qu’ab la fe nais et ab l’obras noiris.
		E qui d’est frug manjara veramen,
		Voldra morir en nom de penedensa;
	15	Don er sa mortz justa, vera naissensa,
		Quel jorn qu’om mor per dieu, nais justamen.
III		Justamen es natz selh cui dieus grazis,
		Pus justamen viu totz temps ses dolor,
		Quan justamen ni ab doussa sabor
	20	Al frug manjat per que s’arma gueris.
		E doncx anem trastug cominalmen
		Manjar d’est frug qu’es la nostra guirensa,
		E trobar l’em oltra mar ses falhensa,
		Lai on dieus fo mortz e vius eissamen.
IV	25	La sua mortz fo dreituriers camis,
		Per on devem anar tuit peccador,
		E qui morra per dieu lo creator,
		Viura totz temps jauzens en paradis;
		Quar aitals mortz es vida ses turmen
	30	E verais frugz de Crist, a cui agensa,
		Per que quasqus deu aver sovinensa
		D’aquest morir per viure lonjamen.
V		Dieus a somost al frug que non peris,
		Lo Talent rei Frederic, mon senhor,
	35	E totz aisselhs que per la su’amor
		Voldran morir e viure, somonis
		Qu’anon manjar sobre paguana gen,
		Que descrezo Crist e sa conoissensa
		E la vera crotz, on non an crezensa,
	40	El sepulcre descrezon malamen.
VI		Senher verais Jhesus, cui son aclis,
		Lums dreituriers de vera resplandor,
		Salvaire Cristz, donatz forsa e vigor
		E bon cosselh’ als vostres pellegris,
	45	Els defendetz de pena e de mal ven,
		Quon ilh puescan passar senes temensa
		Lai per cobrar ab la vostra valensa
		La sancta crotz el verai munimen.
VII		Reis Frederics, vos etz frugz de joven
	50	E frugz de pretz e frugz de conoissensa,
		E si manjatz del frag de penedensa,
		Feniretz be lo bon comensamen.