Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Codi: 156,011 Autor: Guilhem Figueira Gènere: Sirventes Número: IV

 

Quan cug chantar, ieu planc e plor

I	1	Quan cug chantar, ieu planc e plor
		Per so que vei esdevenir;
		Que per pauc non muer de dolor,
		Quant en mon cor pens e consir
	5	La gran perda el dampnage
		Qu’a pres cortezia e solaz,
		Que si de chantar vos mesclatz
		Nius donatz alegrage,
		Hom dira que fols es proaz,
	10	Si de totz jois no vos laissatz.
II		Tornatz es en pauc de valor
		Lo segles, quil ver en vol dir,
		El clerge son ja li pejor,
		Que degran lo mon mantenir,
	15	Que an aital uzage
		Que mais amon gerra que patz,
		Tan lur plaz maleza e peccatz;
		Per qu’al primier passage
		M’en volgra ieu esser passatz,
	20	Quel mais de quan vei, mi desplaz.
III		Entr’ elhs mezeises son trachor
		Li ric malvaz, per quels azir,
		Qu’ilh an huelhs e non an lugor,
		Qu’en re no sabon avenir
	25	Que lur torn a barnage,
		Tan los essorba cobeitatz,
		Enjanz e fina malvestatz;
		Per qu’an perdut parage,
		Ez enaissi pert sas clardatz
	30	Pretz e valors e lialtatz.
IV		Ben volgra fossem d’un senhor
		Ab tan de poder e d’albir
		Qu’als avols tolges la ricor
		E fezes l’als pros departir
	35	E dones l’eretage
		Entre los valentz els prezatz,
		Qu’aissi fol segles comensatz,
		E noi gardes parage
		E mudes totz los rics malvatz,
	40	Con fan Lombart las pozestatz.
V		Ar prec al nostr’ emperador,
		Que s’es crozatz per dieu servir,
		Ques mov’ ab fors’ es ab vigor
		Vas la terra on dieus volc murir
	45	E mes son cors en gage
		Per nos, e’n fo en crotz levatz,
		E totz hom es desesperatz
		Que noi a ferm corage,
		Qui ve con fon marturiatz
	50	Per nos e batutz e nafratz.
VI		Tuit deuriam aver paor,
		Quar mielz no li sabem grazir
		So qu’el sofri per nostr’ amor,
		Qu’el receup mort per mort aucir,
	55	Tan volc nostre homenage;
		Per que fo de bon’ ora natz
		Toz hom quel servira crozaz
		Ni faral seu viage,
		Qu’anc pois qu’el fo deseretatz
	60	Non ac honor cristiandatz.
VII		Emperaire, si beus pensaz,
		Com deus fai vostras voluntatz,
		Mout l’aurez bon corage,
		Qu’el vol, et es vers, so sapchaz,
	65	Que vos cobrez sas heritaz.
VIII		Sirventes, Mon Cenis passaz
		Ez a N’Oth del Carret digaz
		Queus tramet per message,
		Quez an lai on Jesus fo natz,
	70	Puois er sos bos prez coronaz.