Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,043 Autor: Bernart de Ventadorn Gènere: Canso Número: XLIII

 

Can vei la lauzeta mover

I	1	Can vei la lauzeta mover
		de joi sas alas contral rai,
		que s’oblid’ e·s laissa chazer
		per la doussor c’al cor li vai,
	5	ai ! tan grans enveya m’en ve
		de cui qu’eu veya jauzion,
		meravilhas ai, car desse
		lo cor de dezirer no·m fon.
II		Ai, las! tan cuidava saber
	10	d’amor, e tan petit en sai !
		car eu d’amar no·m posc tener
		celeis don ja pro non aurai.
		tout m’a mo cor, e tout m’a me,
		e se mezeis e tot lo mon ;
	15	e can se·m tolc, no·m laisset re
		mas dezirer e cor volon.
III		Anc non agui de me poder
		ni no fui meus de l’or’ en sai
		que·m laisset en sos olhs vezer
	20	en un miralh que mout me plai.
		miralhs, pus me mirei en te,
		m’an mort li sospir de preon,
		c’aissi·m perdei com perdet se
		lo bels Narcisus en la fon.
IV	25	De las domnas me dezesper ;
		ja mais en lor no·m fiarai ;
		c’aissi com las solh chaptener,
		enaissi las deschaptenrai.
		pois vei c’una pro no m’en te
	30	vas leis que·m destrui e·m cofon,
		totas las dopt’ e las mescre,
		car be sai c’atretals se son.
V		D’aisso·s fa be femna parer
		ma domna, per qu’e·lh o retrai,
	35	car no vol so c’om deu voler,
		e so c’om li deveda, fai.
		chazutz sui en mala merce,
		et ai be faih co·l fols en pon ;
		e no sai per que m’esdeve,
	40	mas car trop puyei contra mon.
VI		Merces es perduda, per ver,
		(et eu non o saubi anc mai),
		car cilh qui plus en degr’aver,
		no·n a ges, et on la querrai ?
	45	a ! can mal sembla, qui la ve,
		qued aquest chaitiu deziron
		que ja ses leis non aura be,
		laisse morir, que no l’aon !
VII		Pus ab midons no·m pot valer
	50	precs ni merces ni·l dreihz qu’eu ai,
		ni a leis no ven a plazer
		qu’eu l’am, ja mais no·lh o dirai.
		aissi·m part de leis e·m recre ;
		mort m’a, e per mort li respon,
	55	e vau m’en, pus ilh no·m rete,
		chaitius, en issilh, no sai on.
VIII		Tristans, ges no·n auretz de me,
		qu’eu m’en vau, chaitius, no sai on.
		de chantar me gic e·m recre,
	60	e de joi e d’amor m’escon.