Beltrami, Pietro G. Variazioni di schema e altre note di metrica provenzale: a proposito di Bertran de Born, "Puois Ventadorns" e "Sel qui camja". "Studi Mediolatini e Volgari", 35 (1989), pp. 5-42.

Postilla 2013.

Código: 080,033 Autor: Bertran de Born Género: Sirventes Número: I

Puois Ventadorns e Conborns ab Segur

I	1	Puois Ventadorns e Conborns ab Segur,
		e Torena e Monfortz ab Gordo
		an fait acort ab Peiregorc e jur,
		e li borzes si claven de viro,
	5	m’es bel qu’eu chant e que eu m’entremeta
		d’un sirventes per lor asegurar,
		qu’eu no voill ges sia mia Tolleta
		per qe segurs non i auses estar.
II		A, Pui Gilems e Clarents e Grangnol
	10	e Saint Estier, molt avetz grant honor,
		et eu mezeis, qui conoisser la·m vol,
		e Torena, et Engolmes maior,
		d’en Charretier qui grepis la chareta:
		non a deniers ni no·n pren ses paor,
	15	per c’ab honor prez mais pauca tereta
		que grant enpier tener a desonor.
III		Se·l rics vescoms qui es caps dels Gascos,
		a qui s’aten Bearns e Gavardas,
		e·n Vesians si·s vol, e·n Bernardos,
	20	e·l seigner d’Aics, e Tartas e Marsas,
		d’aquella part aura·l coms pro que fassa;
		et eissamen, aissi com el es pros,
		ab sa grant ost que atrai et amassa
		passe·s en sai et aioste·s ab nos.
IV	25	Si Taillaborcs e Pons e Lezignas
		e Mauleos e Taunais fos en pes,
		et a Sivrac fos vescoms vius e sas,
		ja non creirai qe non nos aiudes;
		cel de Toartz, puois lo coms lo menassa,
	30	teigna·s ab nos e non sia ges vas:
		e demandem li que el dreit nos fassa
		dels homenes qe·ns a traitz d’entre·ls mas.
V		Entre Peitau e la Ysla Bocart
		e Mirabel e Laudun e Chino,
	35	a Clarasvals ant bastit ses regart
		un bel chastel e mes en plan cambo;
		e no voill ges lo sapcha ni lo veia
		lo joves reis, que no·il sabria bo:
		mas paor ai, pois el tant fort blancheia,
	40	q’el o veira ben de Matafelho.
VI		Del rei Felip sabrem be s’el paireia,
		o s’el segra·l bon usatge Karlo
VII		d’en Taillafer, que per seignor l’autreia
		d’Engolesme, don el l’en a fait do.
VIII	45	E non es dreitz de rei que ren autreia,
		puois q’a dig d’oc, qe mais diga de no.