Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,011 Auteur: Guilhem de Montanhagol Genre: Sirventes Numero: XI

On mais a om de valensa

I	1	On mais a om de valensa
		Mielhs si deuria chauzir
		No fezes desconoyssensa.
		Quar om bos leu pot falhir,
	5	E·l malvatz, al mieu albir,
		No falh, quau fai falhimen,
		Quar per dever yssamen
		Fan li malvat malestan,
		Com fan bos fagz li prezan.
II	10	Ges del segle no m'agensa
		Quan n'aug als malvatz mal dir,
		Qu'elh cujon la lur falhensa
		Ab los lur mals digz cubrir.
		E da lur Dieus a culhir
	15	Quad’ an pro vi e fromen,
		E an pro aur e argen,
		E ja ren be no metran,
		Ans valo meins on mais an.
III		Dieus, com pot aver sufrensa
	20	Ricx om de gent aculhir,
		Ni de far guaya parvensa,
		Ni co·s pot de dar tenir,
		Quan ben o pot mantenir?
		Mot i fetz Dieus son talen,
	25	Quar no donet larguamen
		A sels que larguamen dan
		E pauc a sels que pauc dan.
IV		E ja melhur' om e gensa
		En raubas e en guarnir,
	30	E en manhta captenensa,
		E·s vol om trop gent tenir,
		Mas en dar ni en servir
		No vey far melhuramen.
		E doncx, que·us faretz manen?
	35	Ja morretz vos, quan que quan;
		Gardatz que·l temps no·us engan.
V		Coms Cumenges, ses temensa
		Poiri' om a vos venir,
		Que·l sobrenoms es guirensa
	40	De vos, qui·l sap devezir,
		Don paubres deu enriquir,
		Qu'aissi com crezon crezen
		En cumenjar salvamen,
		Deu Cumenges valer tan
	45	Que salv aquels que·l creiran.
VI		Emperaire, pretz valen
		Avetz e valor e sen,
		E quar sabetz valer tan
		A vos vuelh daurar mon chan.
VII	50	Na Guiza, ges no·m repen
		De vos lauzar, quar m'es gen;
		Mas dels vostres tan ni quan
		No·m laus, s'enquer mielhs no fan.