Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,013 Auteur: Guilhem de Montanhagol Genre: Sirventes Numero: XIII

Qui vol esser agradans ni plazens

I	1	Qui vol esser agradans ni plazens
		A totz vuelha dire e far onors,
		A cadaun si co·l devers es lors,
		E no sia autius ni reprendens,
	5	Ans aj' ab si mezura e abstinensa,
		E si' aitals en cor cum en parvensa,
		Quar atressi deu esser vergonhos
		Del mal pessar com del dir totz om bos.
II		Quar anc non dec caber fals pessamens
	10	En liai cor, ans tanh que·s vir alhors,
		E·s cambi tant que non n'iesca clamors;
		Ni no·lh vengua en cor nulhs fols talens,
		Qu'om non es pros qu'us fols volers lo veusa,
		Ni·lh tol razo per far desconoyssensa,
	15	Quar en totz faitz deu gardar totz om bos,
		Ans que·l fassa, si·l faitz li er dans o pros.
III		Res non es tan grazit entre las gens
		Cum mezura, quar als non es valors
		Mas qu'om valha segon qu·es sa ricors.
	20	Quar mezura non es mas solamens
		So que de pauc e de trop tol falhensa;
		Entre aquestz dos la forma conoyssensa
		E fai vertut d'aquestz vicis amdos
		Tollen lo mal d'ambas las falhizos.
IV	25	Omes trob' om larcx e mal conoyssens;
		E largueza non es ans es follors,
		Qui dona si que·l n'en siegua lauzors,
		Quar laus non es mas blasmes e nonsens
		Qui az ome da trop part sa valensa,
	30	E qui·lh da mens fai i mais de falhensa,
		Quar sos dos pert e siec l'en mals ressos,
		Sel qui gieta mezura de sos dos.
V		Quar ges no son egals totas las gens,
		Per que·l savis onra mais los melhors
	35	Mas ar volon li ric fols cridadors,
		Don farion a cridar malamens
		E a blasmar ab crit de viltenensa;
		E quar li fol lauzo ses entendensa
		So qu·ilh mal fan, lur lauzars lur par bos;
	40	Mas fols laus catz quar no·l soste razos.
VI		Om deu esser vergonhos e sufrens,
		Si al segle vol pujar sa valors,
		E temen Dieu creyssera sa ricors
		Ab leialtat et ab essenhamens,
	45	E trobara mezur' e conoyssensa
		Que·lh faran far corteza captenensa
		E laissair mal e far faitz valoros,
		E enaissi aura pretz cabalos.
VII		Reys Castellas, vos tenetz tal tenensa
	50	On totz lo mons troba totz temps valensa,
		E vos fazen rics faitz e cars e bos
		Sabetz lo luec, senher, onrar e vos.