Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,022 Auteur: Folquet de Marselha Genre: Canso Numero: II

Tant m'abellis l'amoros pessamens

		Versione α
I		Tant m’abellis l’amoros pessamens
		que s’es vengutz e mon fin cor assire,
		per que no·i pot nuills autre pens caber
		ni mais negus no m’es doutz ni plazens,
	5	c’adoncs viu sas quan m’aucio·ill cossire;
		e fin’amors aleuja mo martire
		que·m promet joi mas trop lo·m dona len,
		c’ab bel semblan m’a trainat longamen.
II		Ben sai que tot quant fatz es dreitz niens!
	10	Eu qu’en puosc als s’Amors mi vol aucire?
		qu’a escien m’a donat tal voler
		que ja non er vencutz ni el no vens;
		vencutz si er qu’aucir m’an li sospire
		tot soavet, si de lieis cui desire
	15	non ai socors, ni d’aillor no l’aten,
		ni d’autr’ amor non puosc aver talen.
III		Bona dompna, si·us platz, siatz sufrens
		del ben qu’ie·us vuoill, qu’ieu sui del mal sufrire,
		e pois lo mals no·m poira dan tener,
	20	anz m’er semblan que·l partam egalmens;
		e s’a vos platz qu’en autra part me vire,
		ostatz de vos la beutat e·l gen rire
		e·l douz parlar que m’afollis mon sen
		pois partir m’ai de vos, mon escien.
IV	25	A totz jorns m’etz plus bella e plus plazens,
		per qu’ie·n vuoill mal als huoills ab que·us remire,
		car a mon pro no·us poirian vezer
		mas a mon dan vezon trop sotilmens:
		mos dans non es, so sai, pos no·m n’azire
	30	anz es mos pros, dompna, per qu’ieu m’albire,
		si m’aucietz, que no·us estara gen,
		car lo mieus dans vostres er eissamen.
V		Per so, dompna, no·us am saviamens
		c’a vos sui fis et a mos ops traire:
	35	e·us cuig perdre e mi non puosc aver,
		e·us cuig nozer et a mi sui nozens;
		per so no·us aus mon mal mostrar ni dire,
		mas a l’esgar podetz mon cor devire:
		que·us cugei dir, mas aras m’en repen
	40	e port els huoills vergoigna et ardimen.
VI		Trop vos am mais, dompna, qu’ieu no sai dire,
		e car anc jorn aic d’autr’ amor desire
		no m’en penet, anz vos am per un cen,
		car ai proat l’autrui chaptenemen.
VII	45	Vas Nems t’en vai, chanssos, qui que·s n’azire
		car gaug n’auran, per lo mieu escien,
		las tres dompnas a cui eu te presen,
VIII		car ellas tres valon ben d’autras cen.
		Versione β
I		Tant m’abelis l’amoros pessamens
		que s’es vengutz ins en mon cor assire,
		per que no·i pot nulhs autre pens caber
		ni mais negus no m’es dos ni plazens,
	5	c’adoncx viu sas cant m’ausizo·l cossire;
		e fin’ amors aleuja mo martire
		que·m promet joi mais trop lo·m dona len,
		c’ab bel semblan m’a traynat lonjamen.
II		Be sai que tot cant fas es dreitz niens!
	10	E qu’en puesc mays s’amor me vol aussire?
		c’az esien m’a donat tal voler
		on ja non er vencutz ni el no vens;
		vencutz si er c’aussir m’an li sospire
		tot suavet, pus de leys qu’ieu dezire
	15	non ay socors, ni d’alhors non l’aten,
		ni d’autr’ amor non puesc aver talen.
III		Bona dona, si·us platz, siatz sofrens
		del be qu’ie·us vuelh, qu’ieu soi del mal sufrire,
		e pus li mal no·m poiran dan tener,
	20	ans m’er semblans que·ls partam engalmens;
		pero si·us platz c’az autra part me vire,
		partes de vos la beutat e·l dos rire
		e·l bel semblan que m’enfolis mon sen
		pueis partir m’ai de vos, mon essien.
IV	25	A totz jorns m’es pus bel’ e pus plazens,
		per qu’ieu vuelh mal als huelhs ab que·us remire,
		quar a mon pro no·us pogron anc vezer
		car a mon dan vezon trop sotilmens
		mas dans no m’er, car sivals no·m n’azire
	30	ans m’es tan dos, dona, per que m’albire,
		si m’aussizetz que no·us estara jen
		car lo meus dans vostres es eysamen
V		Pero, dona, no·us am saviamens
		c’a vos soi fis et a mos obs traire:
	35	qu’ie·us tem perdre e mi non puesc aver,
		e·us cug nozer e soi a mi nozens;
		pero mos mals no·us aus mostrar ni dire,
		mais a l’esgart podetz mon cor devire
		car lo·us vuelh dir et eras m’en repen
	40	e·n port n’als hueilhs vergonh’ et ardimen.
VI		Trop vos am mais, dona, que no·us sai dire,
		e car anc jor aic d’autr’ amor desire
		no m’en penet, c’ara·us am per un sen,
		car ay proat autrui captenemen.
VII	45	Dona, ·l fin cor qu’ie·us ay no·us puesc tot dire,
		mais per merce so qu’ie·us lais per no-sen
		restauratz vos ab bon entendemen.