Beltran, Vicenç. Tipos y temas trovadorescos. XIV. Alfonso X, Raimon de Castelnou y la corte poética de Rodez. "Le rayonnament des troubadours. Actes du colloque de l'AIEO. Amsterdam, 16-18 Octobre 1995", ed. d'A. Touber. Amsterdam: Rodopi, 1998, pp. 19-40.

Code: 396,006 Auteur: Raimon de Castelnou Genre: Sirventes Numero: -

Mon siruentes tramet al cominal

I		Mon siruentes tramet al cominal
		de tota gen e, si·l uolon auzir
		ni·l entendo ni·l sabo deuezir,
		quascus hi pot triar lo ben del mal;
	5	que cobeytatz a tant sazit em brieu
		lo mon, que no y cort dreg niey cre hom Dieu
		ni no y trob·om merce ni chauzimen
		ni uergonha ab lo pus de la gen.
II		Clergue uolon trastot l'an per engual
	10	ab cobeitat gent caussar e uestir
		e·l ric prelat uolo·s tant enantir
		ses dreytura, alarguar lor deptal;
		e se tenetz de lor un honrat fieu,
		uolran l'auer e no·l cobraretz lieu
	15	se no lor datz una summa d'argen
		o no lor faitz plus estreg couinen.
III		Rey e comte, baylo e senescal
		uolo·ls castels e las terras sazir
		dels lor a tort e l'autra gent delir
	20	e li baro son tornat atretal;
		e ditz quascus: "ieu penrai d'aquo mieu"
		e ab tot son plus paubres que romieu
		e no teno uertat ni sagramen,
		e nos autri em tug d'aquelh eyhs sen.
IV	25	Si monge nier uol Dieus que sian sal
		per pro manjar ni per femnas tenir
		ni monge blanc per boulas amentir
		ni per erguelh Temple ni l'Ospital
		ni canonge per prestar a renieu,
	30	ben tenc per folh sant Peir· e Sanh Andrieu
		que sofriro per Dieu aital turmen
		s'aquest se'n uan aissi a saluamen.
V		Si capelan per pro beure anoal
		e ligista per tort amantenir
	35	e ostalier per lor osta trahir
		e loguadier per falsar lor iornal
		e raubador e bailo e corrieu,
		rauban la gen, se saluo, non cre ieu
		que menudet no uiuon folhamen
	40	e selhs qu·estan cofes e peneden.
VI		Reuendedor, obrier e menestral
		iran a Dieu, si lor o uol sofrir,
		ab car uendre e ab pliuen mentir
		e camjador et home de portal
	45	e renouier yssamen quon iuzieu;
		e noyriguier, panan so quom lor plieu
		e laurador, terras sessals menten,
		festas obran e mezinas crezen.
VII		A l'autra gen dera cosselh leyal
	50	si tot nol say a mos ops retenir:
		que quecx pesses de be far e de dir,
		que no·n aurem negus plus de cabal
		ni·n portarem esgrig e·l nostre brieu
		ad aysselh iorn que redrem comta Dieu,
	55	al derrier iorn que tenra parlamen
		aysel senhor que·ns formet de nien.
VIII		De totz los reys ten hom per pus cabal
		lo rey n'Amfos can fay los faitz grazir:
		e dels comtes, selh de Rodes chauzir
	60	fai sa ualor e son pretz natural;
		e dels prelatz, selh de Memde, que·l trieu
		sec drechamen e despen gent lo sieu;
		e dels baros, son fraire, tan ualen
		son tug siey fag e siey captenemen.
IX	65	Qui mon chantar me repren no m'es grieu
		si maynt fan be, si tot pauc me'n fatz ieu,
		ab que las gens renheson leyalmen;
		pueys poirion dir: "De folh apren hom sen".

 

Texto base de la edición: C.