Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,021 Auteur: Folquet de Marselha Genre: Canso Numero: VII

Sitot me soi a tart aperceubuz

I		Sitot me soi a tart aperceubuz,
		aissi cum cel c’a tot perdut e jura
		que mais non joc, a gran bonaventura
		m’o dei tener c’ar me soi conoguz
	5	del gran enjan c’Amors vas mi fasia,
		c’ab bel semblan m’a tengut en fadia
		mais de dez ans, a lei de mal deutor
		qu’ades promet mas re non pagaria.
II		Ab bel semblan que fals’ Amors aduz
	10	s’atrai vas leis fols amanz e s’atura,
		co·l parpaillos c’a tan folla natura
		que·s fer el foc per la clartat que·i luz;
		mas eu m’en part e segrai altra via,
		sos mal pagaz, qu’esters no m’en partria;
	15	e segrai l’aib de tot bon sufridor
		que s’irais fort si com fort s’umelia.
III		Pero no·s cug, si be·m sui irascuz
		ni fas de leis en chantan ma rancura,
		ja·l diga ren que no semble mesura;
	20	mas ben sapcha qu’a sos ops sui perduz,
		c’anc sobre fre no·m volc menar un dia,
		ans mi fez far mon poder tota-via,
		et anc sempre cavals de gran valor,
		qui·l beorda trop soven, coill felnia.
IV	25	Fels for’ eu trop, mas soi m’en retenguz,
		car cel c’ab plus fort de si·s desmesura
		fai gran foldat; neis en gran aventura
		es de son par, qu’esser en pot vencuz;
		e de plus freol de si es vilania;
	30	per c’anc no·m plac ni·m plaz sobransaria:
		pero en sen deu hom gardar honor,
		car sen aunit non prez plus que folia.
V		Amors, per so m’en soi eu recresuz
		de vos servir, que mais no n’aurai cura;
	35	c’aissi com mais prez’ hom laida pentura
		de long, no fai cant es de pres venguz,
		prezava eu vos mais can no·us conoissia;
		e s’anc ren volc, mais n’ai qu’er non volria:
		c’aissi m’es pres cum al fol queridor
	40	que dis c’aurs fos tot cant el tocaria.
VI		Bels N’Azimans, s’Amors vos destregnia,
		vos ni·N Toztemps, eu vos consellaria:
		sol vos menbres cant eu n’ai de dolor
		ni quant de ben, ja plus no·us en calria.
VII	45	En Plus-Leial, s’ab los hueilhs vos vezia,
		aissi com fatz ab lo cor tota-via,
		so qu’ieu ai dich porri’ aver valor,
		qu’ieu quier conseilh e conseilh vos daria.
		Versione α
I		Sitot me soi a tart aperceubutz,
		aissi cum cel qu’a tot perdut e jura
		que mais non joc, a gran bonaventura
		m’o dei tener c’ar me sui conogutz
	5	del gran engan c’Amors vas mi fazia,
		c’ab bel semblan m’a tengut en fadia
		mais de detz ans, a lei de mal deutor
		c’ades promet mas ren non pagaria.
II		C’ab bel semblan que fals’ Amors adutz
	10	s’atrai vas lieis fols amans e s’atura,
		co·l papaillols qu’a tant folla natura
		que·is met el fuoc per la clartat que lutz;
		mas ieu m’en part e segrai autra via,
		sos mal pagatz, qu’estiers no m’en partria;
	15	e segrai l’aip de tot bon sofridor:
		cum plus s’irais e plus fort somilia.
III		Pero no·is cuig que·m sia irascutz,
		sitot me dic en chantan ma rancura,
		ni·l diga ren que sia outra mesura;
	20	mas ben sapcha c’a sos ops sui perdutz,
		c’anc sobre fre no·m volc menar un dia,
		anz mi fetz far mon poder tota-via,
		et anc sempre cavals de gran valor,
		qui·l beorda trop soven, cuoill feunia.
IV	25	Felz for’ ieu ben, mas sui m’en retengutz,
		car qui ab plus fort de si·s desmesura
		fai gran foudat; e neis en aventura
		n’es de son par, qu’esser en pot vencutz;
		e de plus frevol de si es vilania;
	30	per qu’anc no·m plac ni·m platz sobranssaria:
		pero en sen deu hom gardar honor,
		car sen aunit non pretz plus que foillia.
V		Per so, Amors, mi soi ieu recrezutz
		de vos servir, que mais no n’aurai cura;
	35	c’aisi cum prez’ om plus laida peintura
		quant es de loing que quant es pres vengutz,
		prezava ieu vos mais qand no·us conoissia;
		e s’anc n’aic pauc mais n’ai qu’ieu non volria:
		c’aissi m’es pres cum al fol orador
	40	que dis c’aurs fos tot cant el tocaria.
VI		Bels N’Azimans, s’Amors vos destreignia,
		vos e·N Totztemps, e·us en conseillaria:
		sol vos membres qant ieu n’ai de dolor
		ni qant de be, ja mais no·us en calria.
VII	45	En Plus-Leial, s’ab los huoills vos vezia,
		aissi cum fatz ab lo cor tota-via,
		so qu’ieu ai dig poiria aver valor,
		qu’ieu quier conseill e conseill vos daria.