Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Code: 84bis.1 Auteur: Jaume II d'Aragó Genre: Dansa Numero: IV, 1

Mayre de Deu e fylha

		Incipit dancia illustris regis Aragonum...
I	1	Mayre de Deu e fylha,
		verge humil e bela,
		vostra nau vos apela
		que l'aydetz, quar perylha.
II	5	Perylhan vay en l'onda
		d'aquest mon per tempesta;
		e·l nauchier no·s n'a cura,
		e tant fortun'aonda
		que nulls no·y leva testa
	10	e l'aura qu'es escura.
		E s'ayso gayre dura
		vostra nau es perduda
		si, per la vostr'ajuda,
		no troba port o ylha.
III	15	Nau, leyn, vexel o barcha,
		parlan en ver lenguatge,
		devem tuyt ben entendre
		que signifiquet l'archa
		on l'umanal lynatge
	20	plac a Deus tot compendre,
		per complir et atendre
		so que ja promes era:
		que d'aquell restaurera,
		el cel, manta seÿlha.
IV	25	La nau es carregada
		e de son port se lunha,
		quar trop greu vent la forsa;
		e’s mal amarinada,
		tant que negu no·y punha
	30	cossi la nau estorsa.
		Ha! com fort trai ves orsa,
		que pels timons no·s guia
		ni fay la dreta via
		sol una pauca mylha.
V	35	Mayre, tu·m dona forsa
		contra ma leugeria,
		e·m garda de la via
		de peccat, que·ns exylha.