Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,007 Auteur: Bernart de Ventadorn Genre: Canso Numero: VII

Ara no vei luzir solelh

I	1	Ara no vei luzir solelh,
		tan me son escurzit li rai ;
		e ges per aisso no·m esmai,
		c’una clardatz me solelha
	5	d’amor, qu’ins el cor me raya ;
		e, can autra gens s’esmaya,
		eu melhur enans que sordei,
		per que mos chans no sordeya.
II		Prat me semblon vert e vermelh
	10	aissi com el doutz tems de mai ;
		si·m te fin’ amors conhd’ e gai :
		neus m’es flors blanch’ e vermelha
		et iverns calenda maya,
		que·l genser e la plus gaya
	15	m’a promes que s’amor m’autrei.
		s’anquer no la·m desantreya ?
III		Paor mi fan malvatz cosselh,
		per que·l segles mor e dechai ;
		c’aras s’ajoston li savai
	20	e l’us ab l’autre cosselha
		cossi fin’ amors dechaya.
		a ! mauvaza gens savaya,
		qui vos ni vostre cosselh crei,
		Domnideu perd’ e descreya.
IV	25	D’aquestz mi rancur e·m corelh
		qu’ira me fan, dol et esglai
		e pesa lor del joi qu’eu ai.
		e pois chascus s’en corelha
		de l’autrui joi ni s’esglaya,
	30	ja eu melhor dreih no·n aya.
		c’ab sol deport venz’ e guerrei
		cel qui plus fort me guerreya.
V		Noih e jorn pes, cossir e velh,
		planh e sospir; e pois m’apai.
	35	on melhs m’estai, et eu peihz trai.
		mas us bos respeihz m’esvelha,
		don mos cossirers s’apaya.
		fols ! per que dic que mal traya ?
		car aitan rich’ amor envei,
	40	pro n’ai de sola l’enveya !
VI		Ja ma domna no·s meravelh
		si·lh quer que·m do s’amor ni·m bai.
		contra la foudat qu’eu retrai,
		fara i genta meravelha
	45	s’ilh ja m’acola ni·m baya.
		Deus ! s’er ja c’om me retraya
		(„a ! cal vos vi e cal vos vei !“)
		per benanansa que·m veya ?
VII		Fin’ Amor, ab vos m’aparelh ;
	50	pero no·s cove ni s’eschai,
		mas car per vostra merce·us plai
		(Deus cuit que m’o aparelha !),
		c’aitan fin’ amors m’eschaya.
		ai, domna, per merce·us playa
	55	c’ayatz de vostr’ amic mercei,
		pus aitan gen vos merceya !
VIII		Bernartz clama sidons mercei,
		vas cui tan gen se merceya.
IX		E si eu en breu no la vei,
	60	non crei que lonjas la veya.