Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,025 Auteur: Bernart de Ventadorn Genre: Canso Numero: XXV

Lancan vei la folha                

I	1	Lancan vei la folha
		jos dels albres chazer,
		cui que pes ni dolha,
		a me deu bo saber.
	5	no crezatz qu’eu volha
		flor ni folha vezer,
		car vas me s’orgolha
		so qu’eu plus volh aver.
		cor ai que m’en tolha,
	10	mas no·n ai ges poder,
		c’ades cuit m’acolha,
		on plus m’en dezesper.
II		Estranha novela
		podetz de me auzir,
	15	que, can vei la bela
		que·m soli’ acolhir :
		ara no m’apela
		ni·m fai vas se venir.
		lo cor sotz l’aissela
	20	m’en vol de dol partir.
		Deus, que·l mon chapdela,
		si·lh platz, m’en lais jauzir,
		que s’aissi·m revela,
		no·i a mas del morir.
III	25	Non ai mais fiansa
		en agur ni en sort,
		que bon’ esperansa
		m’a cofondut e mort,
		que tan lonh me lansa
	30	la bela cui am fort,
		can li quer s’amansa,
		com s’eu l’agues gran tort.
		tan n’ai de pezansa
		que totz m’en desconort ;
	35	mas no·n fatz semblansa,
		c’ades chant e deport.
IV		Als no·n sai que dire
		mas : mout fatz gran folor
		car am ni dezire
	40	del mon la belazor.
		be deuri’ aucire
		qui anc fetz mirador !
		can be m’o cossire,
		no·n ai guerrer peyor.
	45	ja·l jorn qu’ela·s mire
		ni pens de sa valor,
		no serai jauzire
		de leis ni de s’amor.
V		Ja per drudaria
	50	no m’am, que no·s cove ;
		pero si·lh plazia
		que·m fezes cal que be,
		eu li juraria
		per leis e per ma fe,
	55	que·l bes que·m faria,
		no fos saubutz per me.
		en son plazer sia,
		qu’eu sui en sa merce.
		si·lh platz, que m’aucia,
	60	qu’eu no m’en clam de re !
VI		Ben es dreihz qu’eu planha,
		s’eu pert per mon orgolh
		la bona companha
		e·l solatz c’aver solh.
	65	petit me gazanha
		lo fols arditz qu’eu colh,
		car vas me s’estranha
		so qu’eu plus am e volh.
		orgolhs, Deus vos franha,
	70	c’ara·n ploron mei olh.
		dreihz es que·m sofranha
		totz jois, qu’eu eis lo·m tolh.
VII		Encontra·l damnatge
		e la pena qu’eu trai,
	75	ai mo bon uzatge :
		c’ades consir de lai.
		orgolh e folatge
		e vilania fai
		qui·n mou mo coratge
	80	ni d’alre·m met en plai,
		car melhor messatge
		en tot lo mon no·n ai,
		e man lo·lh ostatge
		entro qu’eu torn de sai.
VIII	85	Domna, mo coratge,
		·l melhor amic qu’eu ai,
		vos man en ostatge
		entro qu’eu torn de sai.