Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,045 Auteur: Bernart de Ventadorn Genre: Canso Numero: XLV

Tuih cil que·m preyon qu'eu chan                                                                                      

I	1	Tuih cil que·m preyon qu’eu chan,
		volgra saubosson lo ver,
		s’eu n’ai aize ni lezer.
		chantes qui chantar volria !
	5	qu’eu no·n saup ni chap ni via,
		pois perdei ma benanansa
		per ma mala destinansa.
II		Ai las ! com mor de talan !
		qu’eu no dorm mati ni ser,
	10	que la noih, can vau jazer,
		lo rossinhols chant’ e cria,
		et eu, que chantar solia,
		mor d’enoi e de pezansa,
		can au joi ni alegransa.
III	15	D’amor vos dirai aitan :
(V)		qui be la saubes tener,
		res plus no·n pogra valer.
		per Deu, mout fo bona·lh mia !
		mas no·m duret mas un dia,
	20	per qu’es fols qui ses fermansa
		met en amor s’esperansa.
IV		Amors m’a mes en soan
(III)		e tornat a no-chaler.
		e s’eu l’agues en poder,
	25	dic vos qu’e·n feira feunia !
		mas Deus no vol c’Amors sia
		res don om prenda venjansa
		ab coup d’espa’ o de lansa.
V		Amors, e·us prec de mon dan,
(IV)	30	c’autre pro no i posc aver.
		ja mais blandir ni temer
		no·us quer, c’adoncs vos perdria.
		ben es fols qui’n vos se fia,
		c’ab vostra fausa semblansa
	35	m’avetz träit en fiansa.
VI		Pero per un bel semblan
(VII)		sui enquer en bon esper :
		mon Conort dei grat saber,
		c’ades vol qu’eu chan e ria.
	40	e dic vos que, s’ilh podia,
		eu seria reis de Fransa,
		car al plus qu’ilh pot, m’enansa.
VII		Lemozi, a Deu coman
(VI)		leis que no·m vol retener,
	45	qu’era pot ilh be saber
		s’es vers aco que·lh dizia,
		qu’en terr’ estranha·m n’iria,
		pois Deus ni fes ni fiansa
		no m’i poc far acordansa.
VIII	50	No m’o tenh a vilania
		s’eu m’ai sai bon’ esperansa,
		pois ilh lai re no m’enansa.
IX		Romeu man que per m’amia
		e per lui farai semblansa
	55	qu’eu ai sai bon’ esperansa.