Cura Curà, Giulio. Le canzoni del trovatore Uc de Pena. "Critica del Testo", 10, 2 (2007), pp. 9-45.

Code: 456,001 Auteur: Uc de Pena Genre: Canso Numero: I

Cora qe·m desplagues Amors

I	1	Cora qe·m desplagues Amors,
		Ara m’a conquist franchamen,
		E fatz tot son comandamen,
		Per qe·m deu valer sa valors.
	5	Si·s fai, q’en tal m’a faich chausir
		Don totztemps mais l’ai que grazir,
		Sol pel bel semblan amoros
		Qe·m fetz cill don sui envejos.
II		E si·m pren temenssa e paors
	10	Qe l’espers m’aucia sofren
		De lieis, q’am de cor leialmen,
		C’ades sent greujar mas dolors
		Tant que en lieich non puosc dormir,
		Anz m’aven a far maint sospir,
	15	C’anc, pois vi sas bellas faissos,
		Non fui de mos huoills poderos.
III		C’ades se viron lai de cors
		On vezon son bel cors plazen,
		Et il ri lor tant doussamen
	20	Q’ieu no·ls puosc far gardar aillors;
		E s’Amors no·ls en fai gauzir,
		No·i vei conort mas del morir;
		Anz sai c’anc plus aventuros
		Non fon de Franssa Andrieus lo ros.
IV	25	E degra·m far calque socors
		Ma dompna per son chausimen,
		Qu’il sap qe d’autra no l’aten:
		Per qe·il seria mais d’onors
		Si·m fazia tant enardir
	30	Q’ieu l’auses mon fin talan dir,
		Que qand la vei torn oblidos
		De prejar, tant sui temoros.
V		Et anc a·n Golfier de las Tors
		Non pres del messatge tant gen,
	35	Que portet per son ardimen
		En Antiocha als poignadors,
		Don fetz mains paubres enriquir
		E mains manens enpaubrezir,
		Cum a mi fetz, dompna, de vos,
	40	Qan me dissetz c’anes joios.
VI		Per q’ieu puois entre·ls amadors
		Ai estat amorosamen
		Ab gran gauch, ses tot marrimen,
		C’aissi·m ten ric vostra ricors,
	45	Qand el cor vostre cors remir,
		Joves dompna cui tant desir:
		Per qe·m semblaria razos
		C’uoimais degues venir lo dos.
VII		Seign’en Gui, Dieus vos lais venir
	50	De lai on etz per lui servir,
		Car sai meilluratz los plus pros
		E dels avols sabetz far bos.